ابوظہبی، 18 فروری، 2026 (وام) --متحدہ عرب امارات کی فتویٰ کونسل کے تحت قائم 1447 ہجری کی رمضان کریسنٹ سائیٹنگ کمیٹی نے چاند کی رویت کے لیے جدید ٹیکنالوجی سے استفادہ کرتے ہوئے ملک بھر کی مشاہدہ گاہوں سے موصول ہونے والی تصاویر کے تجزیے میں جدید سائنسی خصوصیات کے حامل ڈرونز اور مصنوعی ذہانت کا استعمال کیا۔
اس موقع پر امارات نیوز ایجنسی (وام) سے گفتگو کرتے ہوئے جنرل اتھارٹی برائے اسلامی امور، اوقاف و زکوٰۃ کے چیئرمین ڈاکٹر عمر حبطور الدرعی نے بتایا کہ یہ اقدام کمیٹی کے اعلیٰ ترین معیارِ درستگی کو یقینی بنانے کے عزم کا مظہر ہے۔
انہوں نے واضح کیا کہ کمیٹی شریعت پر مبنی اس اصول پر کاربند ہے جو پیغمبر اسلام حضرت محمد صلی اللہ علیہ وآلہ وسلم کے اس ارشاد پر مبنی ہے کہ، “چاند دیکھ کر روزہ رکھو اور چاند دیکھ کر افطار کرو”، اور اسی کے ساتھ جدید سائنس و ٹیکنالوجی کے فوائد کو بھی یکجا کیا جا رہا ہے۔
ڈاکٹر الدرعی کے مطابق کمیٹی کی کارروائی میں ماہرینِ شریعت اور ماہرین فلکیات کے درمیان مؤثر ہم آہنگی قائم رہی، جبکہ ملک بھر میں قائم چھ سرکاری مشاہدہ گاہوں سے حاصل شدہ ڈیٹا کو بنیاد بنایا گیا۔ انہوں نے کہا کہ یہ طریقۂ کار متحدہ عرب امارات کے شفافیت اور درستگی سے متعلق عزم کی عکاسی کرتا ہے۔