شارجہ، 18 فروری، 2026 (وام) --سپریم کونسل کے رکن اور شارجہ کے حکمران عزت مآب شیخ ڈاکٹر سلطان بن محمد القاسمی نے بدیع محل میں بدھ کی صبح وزیرِ تعلیم محترمہ سارہ بنت یوسف الامیری سے ملاقات کی۔
ملاقات کے آغاز میں شارجہ کے حکمران نے وزیرِ تعلیم کو ماہِ مقدس رمضان کی مبارکباد پیش کی اور دعا کی کہ اللہ تعالیٰ اس بابرکت مہینے کو صحت و عافیت کے ساتھ جاری رکھے، متحدہ عرب امارات کو مزید ترقی و خوشحالی سے نوازے اور عرب و اسلامی اقوام پر اپنی رحمتیں نازل فرمائے۔
ملاقات کے دوران وزارتِ تعلیم کے اُن منصوبوں اور پروگراموں کا جائزہ لیا گیا جو تعلیمی عمل کو جدید تقاضوں سے ہم آہنگ بنانے اور اس میں مسلسل بہتری لانے کے لیے ترتیب دیے گئے ہیں۔ حکمرانِ شارجہ نے طلبہ کو معیاری اور جدید تعلیمی تجربہ فراہم کرنے کی کوششوں کو سراہتے ہوئے اس بات پر زور دیا کہ تعلیمی اقدامات کے ساتھ ساتھ عرب و اسلامی اقدار اور قومی شناخت کے فروغ کو بھی یقینی بنایا جائے۔
اجلاس میں طلبہ کی سائنسی و تحقیقی صلاحیتوں کو مزید مستحکم بنانے کے لیے عالمی، علاقائی اور مقامی سطح پر رائج بہترین تدریسی طریقہ کار اپنانے پر بھی تبادلۂ خیال کیا گیا۔ کارکردگی کے جائزہ پروگراموں کے نتائج پیش کیے گئے، جن میں شارجہ کے نجی اسکولوں کی نمایاں کارکردگی کو اجاگر کیا گیا، جسے حکمرانِ شارجہ کی سرپرستی اور رہنمائی کا ثمر قرار دیا گیا۔
وزیرِ تعلیم محترمہ سارہ الامیری نے پرتپاک استقبال پر شارجہ کے حکمران کا شکریہ ادا کرتے ہوئے شارجہ میں تعلیمی شعبے کی ترقی اور متعدد معیاری اقدامات میں قیادت کے کردار کو سراہا، جنہوں نے شارجہ کو سائنسی اور ثقافتی میدان میں ایک نمایاں مقام دلایا ہے۔