ابوظہبی، 22 فروری، 2026 (وام) --چیئرمین ابوظہبی اسپورٹس کونسل عزت مآب شیخ نہیان بن زاید النہیان نے آج ابوظہبی میں منعقدہ یو اے ای ٹور 2026 کے ساتویں اور آخری مرحلے کے ایک حصے میں شرکت کی۔ یہ مرحلہ اے ڈی پورٹس گروپ کی سرپرستی میں منعقد ہوا۔ شیخ نہیان بن زاید نے ریس کے اختتامی لمحات کا مشاہدہ کیا اور شریک سائیکلسٹس کا خیرمقدم کیا۔
انہوں نے شریک سائیکلسٹس کے اعلیٰ فنی معیار، غیر معمولی پیشہ ورانہ مہارت اور مثالی کھیل کے جذبے کو خراجِ تحسین پیش کرتے ہوئے کہا کہ یہی اوصاف بین الاقوامی سائیکلنگ کیلنڈر میں یو اے ای ٹور کی باوقار اور نمایاں حیثیت کو مزید مستحکم کرتے ہیں۔
یو اے ای ٹور کا آٹھواں ایڈیشن سات مراحل پر مشتمل تھا، جس میں مجموعی طور پر 1,004.2 کلومیٹر کا فاصلہ طے کیا گیا۔ یہ مشرقِ وسطیٰ کی واحد عالمی سائیکلنگ ریس ہے جو یونین سائیکلسٹ انٹرنیشنل کے کیلنڈر میں شامل ہے۔ ایونٹ ابوظہبی اسپورٹس کونسل کے زیر اہتمام اور اے ڈی پورٹس گروپ کے تعاون سے منعقد ہوا، جس میں 21 بین الاقوامی ٹیموں کے 147 سائیکلسٹس نے حصہ لیا۔
ساتویں اور آخری مرحلے ’’اے ڈی پورٹس گروپ اسٹیج‘‘ میں اٹلی کے جوناتھن ملان نے 149 کلومیٹر کا فاصلہ 2 گھنٹے، 56 منٹ اور 48 سیکنڈ میں طے کرتے ہوئے کامیابی حاصل کی۔
میکسیکو کے آئزک ڈیل ٹورو کو یو اے ای ٹور 2026 کا مجموعی چیمپئن قرار دیا گیا۔ یو اے ای ٹیم ایمیریٹس ایکس آر جی کے رائیڈر نے العین میں ماقبل آخری مرحلے میں نمایاں کارکردگی دکھا کر مجموعی برتری اپنے نام کی۔