ابوظہبی، 23 فروری، 2026 (وام) --نائب صدر، نائب وزیر اعظم اور چیئرمین صدارتی دیوان عزت مآب شیخ منصور بن زاید النہیان نے قصر الوطن ابوظہبی میں وزارتی ترقیاتی کونسل کے اجلاس کی صدارت کی، جس میں مختلف حکومتی پالیسیوں، پروگراموں اور ترقیاتی منصوبوں کے نفاذ کا تفصیلی جائزہ لیا گیا۔
اجلاس کے دوران کونسل نے متحدہ عرب امارات کے مختلف شعبہ جات میں عملی کارکردگی کو مزید مؤثر بنانے کے لیے پیش کردہ متعدد منصوبوں پر غور کیا۔ وفاقی اداروں کی جانب سے قومی صحت اور غذائیت سے متعلق پیش کی گئی حکمت عملیوں کا بھی جائزہ لیا گیا، جن کا مقصد صحت عامہ کے اشاریوں کو بہتر بنانا اور معیارِ زندگی کو بلند کرنا ہے۔
کونسل نے اقتصادی انضمام کی پہل کاریوں اور ثقافتی و تخلیقی صنعتوں کے فروغ سے متعلق تازہ ترین پیش رفت پر تبادلہ خیال کیا۔ اجلاس میں اماراتی پیشہ ور افراد کی علاقائی اور بین الاقوامی تنظیموں میں مؤثر نمائندگی اور شمولیت کو بڑھانے کے اقدامات پر بھی غور کیا گیا۔
حکومتی امور کے ضمن میں کونسل نے وزارتِ تعلیم اور وفاقی اتھارٹی برائے شناخت، شہریت، کسٹمز اور پورٹ سیکیورٹی کے لیے خدمات کو منظم کرنے سے متعلق مجوزہ وفاقی قانون سازی کے مسودات کا جائزہ لیا۔ علاوہ ازیں خاندانی کاروبار اور قومی ٹیکس فریم ورک سے متعلق ضابطہ جاتی فیصلوں پر بھی تفصیلی غور کیا گیا۔