ابوظبی، 25 فروری، 2026 (وام) -- نیشنل سینٹر آف میٹرولوجی نے ملک کے مختلف حصوں میں گھنے کہر اور انتہائی کم حد نگاہ کے پیش نظر موسمی الرٹ جاری کرتے ہوئے مسافروں اور رہائشیوں کو غیر معمولی احتیاط برتنے کی ہدایت کی ہے۔
محکمہ موسمیات کے مطابق منگل کی رات دیر گئے سے فضا میں نمی کی بلند شرح اور درجہ حرارت میں کمی کے باعث ساحلی پٹیوں اور قریبی جزیروں پر گھنا کہر چھانے کا امکان ہے۔ الرٹ کے مطابق افقی حد نگاہ نمایاں طور پر کم ہو کر بعض مقامات پر تقریباً صفر تک پہنچ سکتی ہے، جس سے سڑکوں پر سفر کرنے والوں کو شدید مشکلات کا سامنا ہو سکتا ہے۔
این سی ایم کے مطابق یہ موسمی صورتحال منگل 24 فروری کو رات 11:30 بجے سے شروع ہو کر بدھ کی صبح کم از کم 10:00 بجے تک برقرار رہنے کی توقع ہے، تاہم مقامی موسمی تغیرات کے باعث بعض علاقوں میں اس کا دورانیہ بڑھ بھی سکتا ہے۔
محکمہ موسمیات نے ڈرائیوروں کو ہدایت کی ہے کہ وہ غیر ضروری سفر سے گریز کریں اور اگر سفر ناگزیر ہو تو رفتار کم رکھیں، گاڑیوں کے درمیان مناسب فاصلہ برقرار رکھیں اور ٹریفک قوانین کی مکمل پابندی کریں۔ حکام نے اس بات پر خصوصی زور دیا ہے کہ کہر کے دوران ہیزرڈ لائٹس استعمال نہ کی جائیں کیونکہ اس سے دیگر ڈرائیوروں کے لیے فاصلہ اور رفتار کا درست اندازہ لگانا مشکل ہو جاتا ہے۔