ابوظہبی، 2 نومبر 2026 (وام) --متحدہ عرب امارات کے صدر عزت مآب شیخ محمد بن زاید النہیان نے آج جرمن ریاست باویریا کے وزیرِاعلیٰ ڈاکٹر مارکوس سوڈر سے ملاقات کی، جو متحدہ عرب امارات کے ورکنگ دورے پر ہیں۔
ملاقات کے دوران دونوں فریقوں نے متحدہ عرب امارات اور باویریا کے درمیان مستقبل کی ترقی سے وابستہ ترجیحی شعبوں میں تعاون مزید بڑھانے کے عزم کا اعادہ کیا۔ ان شعبوں میں معیشت، جدید ٹیکنالوجی، روایتی و قابل تجدید توانائی، جدت اور صنعت شامل ہیں۔
گفتگو میں متحدہ عرب امارات کے صدر کے حالیہ دورۂ جرمنی اور اس کے نتیجے میں دوطرفہ شراکت داری میں ہونے والی پیش رفت کا بھی جائزہ لیا گیا۔ دونوں فریقوں نے طویل مدتی اقتصادی اور ترقیاتی شراکت داری کو مزید مضبوط بنانے، مستقبل کی صنعتوں میں تعاون بڑھانے اور تجربات و مہارتوں کے تبادلے کے نئے مواقع پر تبادلہ خیال کیا۔
دونوں رہنماؤں نے دسمبر میں متحدہ عرب امارات کی میزبانی میں ہونے والی اقوام متحدہ آبی کانفرنس 2026 پر بھی بات چیت کی۔ انہوں نے پانی سے متعلق عالمی چیلنجز کے اختراعی حل تلاش کرنے اور پائیدار آبی تحفظ کو فروغ دینے کے لیے مشترکہ کوششوں کو آگے بڑھانے میں کانفرنس کی اہمیت پر زور دیا۔
ملاقات میں ابوظہبی کے ولی عہد عزت مآب شیخ خالد بن محمد بن زاید النہیان، الظفرہ ریجن میں حکمران کے نمائندے عزت مآب شیخ حمدان بن زاید النہیان، نائب وزیراعظم و وزیر خارجہ عزت مآب شیخ عبداللہ بن زاید النہیان، صدارتی دیوان برائے خصوصی امور کے نائب چیئرمین عزت مآب شیخ حمدان بن محمد بن زاید النہیان، متحدہ عرب امارات کے صدر کے مشیر شیخ محمد بن حمد بن طحنون النہیان اور متعدد وزرا و حکام شریک تھے۔
باویریا کے وزیرِاعلیٰ کے ہمراہ وفد کے ارکان نے بھی ملاقات میں شرکت کی۔