ابوظہبی، 22 جنوری، 2024 (وام) -- ابوظہبی کے حکمران کی حیثیت سے، متحدہ عرب امارات کے صدر عزت مآب شیخ محمد بن زاید النہیان نے مصنوعی ذہانت اور جدید ٹیکنالوجی کونسل (اے آئی اے ٹی سی) کے قیام کا قانون جاری کیا ہے۔
کونسل ابوظہبی میں مصنوعی ذہانت اور جدید ٹیکنالوجی میں تحقیق، بنیادی ڈھانچے اور سرمایہ کاری سے متعلق پالیسیوں اور حکمت عملیوں کو تیار کرنے اور ان پر عمل درآمد کرنے کی ذمہ دار ہوگی۔
عزت مآب نے نئی کونسل کے ممبران کی تقرری کے لئے ایک قرارداد بھی جاری کی ہے۔ حکمراں کی قرارداد میں ابوظہبی کے نائب حکمران عزت مآب شیخ طہنون بن زاید النہیان کو اے آئی اے ٹی سی کا چیئرمین اور عزت مآب شیخ خالد بن محمد بن زاید النہیان، ابوظہبی کے ولی عہد اور ابوظہبی ایگزیکٹو کونسل کے چیئرمین کو وائس چیئرمین مقرر کیا گیا ہے۔ قرارداد میں خلدون خلیفہ المبارک، جاسم محمد بو عتبہ الزابی، فیصل عبدالعزیز البنائی اور پینگ شیاؤ کو اے آئی اے ٹی سی کا رکن مقرر کیا گیا ہے۔
اے آئی اے ٹی سی کا قیام مستقبل کی معیشت کی تعمیر میں تکنیکی قیادت کی اہمیت پر مضبوط یقین کی عکاسی کرتا ہے۔ کونسل مصنوعی ذہانت اور جدید ٹیکنالوجی کے شعبوں میں ابوظہبی کی حیثیت کو بڑھانے کے لئے مقامی اور عالمی شراکت داروں کے تعاون سے منصوبے اور تحقیقی پروگرام تیار کرے گی۔ یہ ابوظہبی کی اس حکمت عملی کی تکمیل کرتا ہے کہ امارات کو اس شعبے میں سرمایہ کاری، شراکت داری اور ٹیلنٹ کے لیے دنیا کے معروف مرکز کے طور پر پیش کیا جائے۔
اے آئی اے ٹی سی کا قیام متحدہ عرب امارات کے صدر عزت مآب شیخ محمد بن زاید النہیان کے جرات مندانہ وژن اور مستقبل کے شعبوں کی اہمیت پر زور دینے والی دانشمندانہ ہدایات کا مظہر ہے۔ یہ کونسل ہائیڈروکاربن کے بعد کی معیشت کی مسلسل ترقی اور خوشحالی کو بڑھانے اور یقینی بنانے میں اپنا کردار ادا کرے گی۔