ابوظبی،26 جنوری ، 2024 (وام) ۔۔آپریشن گیلنٹ نائٹ 3 کے تحت غزہ کی پٹی میں برسرپیکار ہلال احمر امارات کی ٹیم سےغزہ کی وزارت صحت اور مقامی ہسپتال کے ڈائریکٹرز کےایک طبی وفد نے ملاقات کی۔ غزہ کی پٹی میں متحدہ عرب امارات کا جامع فیلڈ ہسپتال جو مقامی فلسطینیوں کو طبی علاج اور ایمبولینس کی خدمات فراہم کررہاہے کے بارے میں وزارت کے وفد کو بریفنگ دی گئی۔
ہلال احمر امارات کی ٹیم نے ہسپتال کی طبی اور علاج معالجے کی خدمات پر بھی تبادلہ خیال کیا جو کہ غزہ کی پٹی میں صحت کی مایوس کن صورتحال سے دوچار غزہ کے باشندوں کے لیے متحدہ عرب امارات کی طبی امداد کا حصہ ہیں۔ طبی وفد نے غزہ کے لوگوں کے لیے صدر عزت مآب شیخ محمد بن زاید النہیان کی ہدایت کے مطابق متحدہ عرب امارات کی کوششوں کے ساتھ ساتھ اس کی طرف سے فراہم کی جانے والی طبی امداد، جس میں فیلڈ ہسپتال کا قیام بھی شامل ہے پر اظہار تشکر کیا۔
وفد نے کہا کہ متحدہ عرب امارات ہمیشہ فلسطینی عوام کا ایک بڑا حامی رہا ہے اور مختلف حالات میں فلسطینیوں کی مدد کے لیے اس ملک کے ثابت قدم انسان دوستانہ موقف کو سراہا۔ اماراتی ہسپتال میں مختلف سرجریوں جیسے جنرل، پیڈیاٹرک اور ویسکولر سرجری کے لیے آپریٹنگ کمرے ہیں۔ اس میں بالغوں اور بچوں کی انتہائی نگہداشت کے کمرے، ایک اینستھیزیا کا شعبہ اور مختلف طبی شعبوں جیسے اندرونی ادویات، دندان سازی، آرتھوپیڈکس، نفسیات، فیملی میڈیسن، پیڈیاٹرکس اور گائنی کے ماہر کلینک بھی ہیں۔
یہ ہسپتال معاون طبی خدمات کے علاوہ سی ٹی سکین اور ایکسرے کی خدمات بھی پیش کرتا ہے۔ اس میں ایک فارمیسی اور ایک لیبارٹری ہے جس میں مختلف ٹیسٹوں کے لیے جدید ترین آلات موجود ہیں جو اسے بہترین بین الاقوامی معیارات اور پروٹوکول کے مطابق مریضوں اور مستحقین کو مکمل علاج فراہم کرنے کے قابل بناتا ہے۔