دبئی، 25 اپریل، 2024 (وام) ۔۔ متحدہ عرب امارات کی حکومت نے ازبکستان کے سرکاری کیڈرز کی مختلف شعبوں میں صلاحیتوں کو بڑھانے اورانسانی وسائل و انسانی سرمائے کی سرمایہ کاری سے متعلق بہترین طریقہ کار کے لیے خصوصی پروگرام کا انعقاد کیا۔
یہ پروگرام ایک ازبک وفد کے یو اے ای کے سرکاری دورے کے دوران دونوں ممالک کے درمیان حکومت کی جدید کاری میں اسٹریٹجک شراکت داری کے تحت منعقد کیاگیا۔
وفد کو مستقبل کے چیلنجوں اور ضروریات سے ہم آہنگ ہونے کے لیے انسانی وسائل کے نظام کو ترقی اور جدید بنانے میں متحدہ عرب امارات کی حکومت کی مہارت کے بارے میں آگاہ کیاگیا۔
وفد میں ازبکستان کے صدارتی دفتر اور اس کے ماتحت عوامی خدمات کی ترقی کی ایجنسی،وزارت روزگار و محنت ، اور وزارت کھیل اور مختلف اداروں کے افسران اور ملازمین شامل تھے۔
دورے کا مقصد متحدہ عرب امارات کی حکومت کے انسانی وسائل کے نظام کے بہترین طریقوں کے بارے میں آگاہی اور اس کی نگرانی اور ترقی میں وفاقی اتھارٹی برائے سرکاری انسانی وسائل (ایف اے ایچ آر) کے کردار کو سمجھنا تھا۔
مسابقتی اور تجربات کے تبادلے کے لیے کابینہ امور کے نائب وزیر عبداللہ ناصر لوتاہ نے کہا کہ متحدہ عرب امارات کی حکومت انسانی سرمائے میں سرمایہ کاری، ہنرکی ترقی اورہنر مند افراد کو راغب کرنے کے لیے جدید نظام نافذ کر رہی ہے۔ یہ نظام دانشمندانہ قیادت کے وژن کی عکاسی اوراس بات کا اعتراف کرتا ہے کہ مستقبل کے لیے سب سے قیمتی سرمایہ کاری انسانی وسائل کو فروغ دینے اور پائیدار بنیادوں پر حکومتی مہارتوں اور صلاحیتوں کو بڑھانے میں مضمر ہے۔
انہوں نے کہا کہ اس نقطہ نظر سے لیبر مارکیٹ کی ابھرتی ہوئی تبدیلیوں، چیلنجز اور مستقبل کے تقاضوں کے ساتھ ہم آہنگی کو یقینی بنایا جاسکتا ہے۔
انہوں نے اس بات کو اجاگرکیا کہ متحدہ عرب امارات کی حکومت کا انسانی وسائل کا نظام ایک کامیابی کی ایک کہانی ہے، جسے حکومت دیگر ممالک کے ساتھ شیئر کرنے کی خواہاں ہے۔ اس کوشش کا مقصد سرکاری امور کے ماحول کی کشش، ٹیلنٹ اور صلاحیت سازی ہے۔
ایف اے ایچ آر کی ڈائریکٹر جنرل لیلیٰ عبید السویدی نے ازبک وفد کا خیرمقدم کرتے ہوئے اس بات پر زور دیا کہ یہ دورہ جدید اور حکومتی ترقی میں دونوں دوست ممالک کے درمیان تعلقات کی گہرائی کو ظاہر کرتا ہے۔ یہ علم کے تبادلے اور انسانی سرمائے کی ترقی میں متحدہ عرب امارات کی حکومت کے تجربے سے فائدہ اٹھانے کے لیے گزشتہ برسوں میں منعقد کی گئی اسی طرح کی ملاقاتوں کے سلسلے کا تسلسل ہے۔
انہوں نے بتایاکہ وفاقی حکومت کا انسانی وسائل کا نظام دنیا کے بہترین نظاموں میں سے ایک ہے۔ اس نظام میں جدید انسانی وسائل کے اقدامات کے ساتھ جامع پالیسیاں، قانون سازی، سمارٹ سسٹمز اور ایپلی کیشنز شامل ہیں۔
ایف اے ایچ آرکے زیر اہتمام ایک تربیتی پروگرام اورخصوصی ورکشاپس کا انعقاد کیاگیا۔ سیشنز کے دوران، وفد کو ہیومن ریسورس مینجمنٹ انفارمیشن سسٹم "بیاناتی" سے متعارف کرایا گیا۔
ورکشاپس میں اتھارٹی کی حکمت عملی کا بھی احاطہ کیا گیا، جس میں متحدہ عرب امارات کی حکومت میں انسانی وسائل سے متعلق کلیدی طریقہ کار، قوانین اور قانون سازی پر روشنی ڈالی گئی۔
اتھارٹی کی ٹیم نے ازبکستان کی حکومت کے اندر الیکٹرانک ایچ آر پلیٹ فارم "hrm.argos.uz" کو بڑھانے اور بہتر بنانے کے لیے وفد کے ساتھ ایک منصوبے پر تبادلہ خیال کیا۔
حکومت کی جدید کاری کی تزویراتی شراکت داری پر اپریل 2019 میں متحدہ عرب امارات اور ازبکستان کے درمیان دستخط ہوئے تھے۔ گزشتہ برسوں میں، شراکت داروں نے تعاون کے 37 شعبوں میں اختراعی منصوبے شروع کیے۔
ان اقدامات کے تحت 2.85 ملین ازبک ملازمین کی 26 ملین گھنٹے سے زیادہ کی تربیت کے ذریعے صلاحیتوں سازی کی گئی ہے۔