دبئی، 4 فروری 2025 (وام) – متحدہ عرب امارات کے نائب صدر، وزیر اعظم، اور دبئی کے حکمران، عزت مآب شیخ محمد بن راشد المکتوم نے "یو اے ای SWAT چیلنج 2025" کے ایک حصے میں شرکت کی، جو وزارت داخلہ کے زیر اہتمام اور دبئی پولیس کی میزبانی میں الروعیہ کے ٹریننگ سٹی میں منعقد ہو رہا ہے۔
شیخ محمد بن راشد المکتوم کے ہمراہ چیئرمین دبئی پورٹس اور بارڈرز سیکیورٹی کونسل شیخ منصور بن محمد بن راشد المکتوم اور اعلیٰ سیکیورٹی حکام بھی موجود تھے۔
انہوں نے "ہائی ٹاور چیلنج" میں حصہ لینے والی ایلیٹ ٹیموں کے مظاہرے دیکھے۔
اس سال کے ایڈیشن نے نیا ریکارڈ قائم کیا، جس میں 46 ممالک کی 105 ٹیمیں چھ براعظموں سے شریک ہوئیں، جس سے یہ دنیا کی سب سے بڑی 'SWAT' اور اسپیشل فورسز مقابلہ بن گیا۔
شیخ محمد نے اس موقع پر نشانہ بازی اور تیزی سے اترنے کی تکنیکوں کے مظاہرے دیکھے، جو ٹیموں کی چُستی اور عملی مہارت کو اجاگر کرتے ہیں۔
انہیں مقابلے میں شریک ٹیموں کی اعلیٰ سطح کی تربیت اور آپریشنل تیاری پر بریفنگ دی گئی، جس میں عالمی سیکیورٹی تعاون کے فروغ میں اس ایونٹ کے کردار پر روشنی ڈالی گئی۔
شیخ محمد بن راشد نے وزارت داخلہ کی قیادت، خصوصاً نائب وزیر اعظم اور وزیر داخلہ، عزت مآب لیفٹیننٹ جنرل شیخ سیف بن زاید آل نہیان کی کاوشوں کو سراہا، جن کی قیادت میں یہ چیلنج کامیابی سے منعقد ہوا۔
انہوں نے دبئی پولیس کی بھی تعریف کی، جو اس عالمی سطح کے ایونٹ کی میزبانی میں کلیدی کردار ادا کر رہی ہے۔
دورانِ تقریب، دبئی پولیس کے کمانڈر ان چیف، لیفٹیننٹ جنرل عبداللہ خلیفہ المری نے شیخ محمد بن راشد کو "چیلنج شیلڈ" پیش کی، اور انہیں ایک سرکاری سرٹیفکیٹ دیا گیا، جس میں "یو اے ای SWAT چیلنج" کو دنیا میں سب سے زیادہ ممالک کے شرکاء رکھنے والی اسپیشل فورسز مقابلے کے طور پر گنیز ورلڈ ریکارڈ میں شامل کرنے کی تصدیق کی گئی۔
شیخ محمد بن راشد نے دبئی پولیس ویمن ٹیم سے بھی ملاقات کی، اور سیکیورٹی کے شعبے میں ان کی شرکت اور کارکردگی کو سراہا۔
انہوں نے خواتین پر زور دیا کہ وہ اپنی مہارت کو مسلسل ترقی دیں، کیونکہ ملکی ترقی میں خواتین کا کردار انتہائی اہم ہے۔
"یو اے ای SWAT چیلنج" پانچ بڑے مقابلوں پر مشتمل ہے جن میں ٹیکٹیکل آپریشنز، اسالٹ چیلنج، آفیسر ریسکیو، ہائی ٹاور چیلنج، اوبسٹیکل کورس شامل ہیں۔
یہ مقابلہ ٹیکٹیکل یونٹس کے درمیان مہارتوں کے تبادلے کو فروغ دیتا ہے، تیز ردعمل اور آپریشنل مہارت کی جانچ کے لیے عالمی سطح کے بہترین طریقوں کو متعارف کراتا ہے اور دباؤ کے حالات میں ٹیموں کی استعداد کار اور تیاری کا جائزہ لیتا ہے۔
"یو اے ای SWAT چیلنج 2025" نہ صرف عالمی سطح پر سیکیورٹی اور دفاعی مہارتوں میں اضافہ کر رہا ہے، بلکہ بین الاقوامی سطح پر امارات کی سیکیورٹی تعاون میں قیادت کو بھی اجاگر کر رہا ہے۔