شارجہ، 13 فروری 2025 (وام) – ایئر عربیہ نے سال 2024 کے لیے اپنی مالیاتی اور عملیاتی کارکردگی کے نتائج کا اعلان کیا ہے۔
ایئرلائن نے 1.6 ارب درہم کا ریکارڈ قبل از ٹیکس منافع حاصل کیا، جو 2023 میں 1.5 ارب درہم کے مقابلے میں 4 فیصد زیادہ ہے۔ سالانہ مجموعی آمدنی 6.63 ارب درہم سے تجاوز کر گئی، جو 2023 میں 6 ارب درہم کے مقابلے میں 11 فیصد کا اضافہ ظاہر کرتی ہے۔
سال 2024 میں، ایئر عربیہ نے اپنی توسیعی حکمت عملی اور عملیاتی کارکردگی کو مزید مستحکم کیا، چھ مراکز میں اپنے نیٹ ورک کو وسعت دی اور 31 نئی پروازوں کا اضافہ کیا۔ اس توسیع کی بدولت آپریٹنگ صلاحیت میں 13 فیصد اضافہ ہوا، جبکہ کل مسافروں کی تعداد 12 فیصد بڑھ کر 18.8 ملین تک پہنچ گئی۔ ایئرلائن نے اپنی نشستوں کے بھرنے کی اوسط شرح (سیٹ لوڈ فیکٹر) میں بھی 2 فیصد کا اضافہ کیا، جو 82 فیصد تک پہنچ گئی، جو اس کی کم لاگت والی خدمات کی مسلسل طلب کو ظاہر کرتی ہے۔
ایئر عربیہ کے بورڈ آف ڈائریکٹرز نے 25 فیصد منافع تقسیم کرنے کی تجویز دی ہے، جو فی حصص 25 فلس کے برابر ہے۔ یہ تجویز حالیہ بورڈ اجلاس میں پیش کی گئی اور اسے سالانہ جنرل میٹنگ (AGM) میں شیئر ہولڈرز کی منظوری کے بعد حتمی شکل دی جائے گی۔
ایئر عربیہ کے چیئرمین، شیخ عبداللہ بن محمد آل ثانی نے کہاکہ، "سال 2024 ایئر عربیہ گروپ کے لیے ایک ریکارڈ ساز سال رہا، جس میں نمایاں توسیع اور اہم مارکیٹوں میں ہمارا اثر و رسوخ بڑھا۔ ہم نے اپنی مضبوط بنیادوں پر مزید ترقی حاصل کی، جو ہمارے کاروباری ماڈل کی طاقت، مینجمنٹ ٹیم کی صلاحیت اور ہماری اسٹریٹجک حکمت عملی کی کامیابی کو ثابت کرتی ہے۔"