نیویارک، 30 اپریل، 2025 (وام)-- اقوام متحدہ میں متحدہ عرب امارات کے مستقل مشن نے ایک سخت اور باضابطہ بیان جاری کرتے ہوئے سوڈانی مسلح افواج (SAF) کے نمائندے پر الزام عائد کیا ہے کہ وہ اقوام متحدہ کی سلامتی کونسل کے پلیٹ فارم کو غلط معلومات پھیلانے اور عالمی رائے عامہ کو گمراہ کرنے کے لیے استعمال کر رہے ہیں۔
یو اے ای کے مشن نے اقوام متحدہ کی سلامتی کونسل کو رسمی خط ارسال کیا، جس میں کہا گیا ہے کہ سوڈانی نمائندے نے اقوام متحدہ کے ماہرین کی رپورٹ کی غلط تشریح کرتے ہوئے ایک ایسی "گمراہ کن مہم" کو فروغ دیا ہے جو ناقابلِ قبول ہے، اور اسے کسی صورت برداشت نہیں کیا جانا چاہیے۔
خط میں اس بات پر زور دیا گیا کہ سلامتی کونسل جیسے معتبر بین الاقوامی پلیٹ فارم کو جھوٹے بیانیے اور پروپیگنڈہ کے لیے استعمال کرنا نہ صرف اقوام متحدہ کی ساکھ کے منافی ہے بلکہ اس سے سوڈان میں جاری انسانی بحران سے توجہ ہٹانے کی کوشش کی جا رہی ہے۔
یو اے ای کے مشن نے اپنے بیان میں کہاکہ، "سلامتی کونسل کو نہ صرف اپنے پلیٹ فارم کے غلط استعمال سے گریز کرنا چاہیے بلکہ اقوام متحدہ کی رپورٹس کی مسخ شدہ نمائندگی کو بھی سختی سے روکنا چاہیے۔"
خط میں عالمی برادری کی بڑھتی ہوئی تشویش کی نشاندہی کی گئی، جو سوڈان میں جاری تنازع اور اس کے گرد رچائے گئے جھوٹے بیانیوں سے جڑی ہے۔ یو اے ای نے زور دیا کہ عالمی توجہ کا مرکز جنگ بندی کا حصول، انسانی امداد کی فراہمی، اور سیاسی حل کی طرف پیش رفت ہونا چاہیے، نہ کہ ایسے پروپیگنڈہ بیانات جو زمینی حقائق سے توجہ ہٹانے کے لیے گھڑے جاتے ہیں۔
خط میں سوڈانی مسلح افواج پر زور دیا گیا کہ وہ "جنگ بندی کے حصول، انسانی امداد تک رسائی کی سہولت، اور ایسے امن مذاکرات میں شرکت کو ترجیح دیں جن کا واضح مقصد ایک ایسی حکومت کی طرف منتقلی ہو جو فوجی کنٹرول سے آزاد اور شہری قیادت میں ہو،" بجائے اس کے کہ وہ "بین الاقوامی برادری کی توجہ سوڈان میں اپنے ہی مظالم سے ہٹانے کی کوششیں جاری رکھیں۔"