ابوظبی، 7 مئی، 2025 (وام)--متحدہ عرب امارات نے واضح کیا ہے کہ وہ پورٹ سوڈان اتھارٹی کے فیصلے کو تسلیم نہیں کرتا کیونکہ یہ اتھارٹی سوڈان کی جائز حکومت اور معزز عوام کی نمائندگی نہیں کرتی۔ متحدہ عرب امارات نے کہا کہ نام نہاد ’سکیورٹی اور ڈیفنس کونسل‘ کی جانب سے جاری کردہ بیان سوڈان اور امارات کے درمیان گہرے اور دیرینہ تعلقات پر اثرانداز نہیں ہوگا۔
وزارت خارجہ نے ایک بیان میں کہا کہ پورٹ سوڈان اتھارٹی کی جانب سے متحدہ عرب امارات سے سفارتی تعلقات منقطع کرنے کا اعلان دراصل بین الاقوامی عدالت انصاف (ICJ) کی جانب سے ان کی دائر کردہ درخواست خارج کیے جانے کے ایک دن بعد کا ردعمل ہے۔ وزارت نے ان بیانات کو قابل مذمت اور امن کی کوششوں کو سبوتاژ کرنے کی ایک چال قرار دیا۔
بیان میں مزید کہا گیا کہ سوڈان اور اس کے باوقار عوام ایک سویلین حکومت کے مستحق ہیں، جو فوجی اثر و رسوخ سے آزاد ہو اور جو اپنے عوام کے مفادات کو ترجیح دے، نہ کہ آدھی آبادی کو قتل کرے اور باقی کو بھوک و ہجرت کا شکار بنائے۔
وزارت نے اس بات پر زور دیا کہ متحدہ عرب امارات سوڈانی عوام کے ساتھ یکجہتی پر قائم ہے، خاص طور پر یو اے ای میں مقیم بڑی سوڈانی کمیونٹی اور سوڈانی زائرین کے ساتھ، جن پر حالیہ فیصلوں کا کوئی اثر نہیں پڑے گا۔ متحدہ عرب امارات گزشتہ پانچ دہائیوں سے سوڈان کا قابل اعتماد شراکت دار رہا ہے اور آئندہ بھی برادر سوڈانی عوام کے ساتھ اپنی حمایت اور یکجہتی جاری رکھے گا۔