منسک، 8 مئی، 2025 (وام)--بیلاروس کے صدر الیگزینڈر لوکاشینکو نے کہا ہے کہ متحدہ عرب امارات اور بیلاروس کے درمیان اقتصادی تعاون باہمی ترقی اور خوشحالی کے حصول کے لیے پرامن شراکت داری کا ایک قابلِ تقلید ماڈل بن چکا ہے۔ انہوں نے یہ بات دارالحکومت منسک میں اماراتی سرمایہ کاری سے تعمیر کیے گئے "انٹرنیشنل ایگزیبیشن سینٹر" کی افتتاحی تقریب کے موقع پر امارات نیوز ایجنسی (وام) سے گفتگو کرتے ہوئے کہی۔
صدر لوکاشینکو نے اس تعاون کو دونوں ملکوں کی قیادتوں کے درمیان اعلیٰ سطح کے اعتماد کا مظہر قرار دیا اور کہا کہ یہی اعتماد مختلف شعبوں میں حاصل کی گئی کامیابیوں پر مزید ترقی کی بنیاد فراہم کر رہا ہے۔ انہوں نے کہا کہ یہ منصوبہ دونوں ممالک کے درمیان تیزی سے فروغ پاتی اقتصادی شراکت داری کا ایک اہم سنگِ میل ہے، اور بیلاروس میں اسٹریٹجک نوعیت کے منصوبوں میں یو اے ای کی سرمایہ کاری کو سراہا۔
صدر لوکاشینکو نے صدر عزت مآب شیخ محمد بن زاید النہیان کے لیے گہری قدردانی اور شکریہ کا اظہار کیا اور ان کی قیادت میں دوستانہ تعلقات اور تعاون کے فروغ کے لیے دی گئی ذاتی توجہ کو سراہا۔ انہوں نے متحدہ عرب امارات کے لیے مسلسل ترقی، استحکام اور خوشحالی کی خواہش کا اظہار بھی کیا۔
اس موقع پر منعقدہ افتتاحی تقریب میں وزیرِ مملکت برائے غیر ملکی تجارت ڈاکٹر ثانی بن احمد الزیودی، اور بیلاروس میں امارات کے سفیر ابراہیم سالم المشرخ کے ساتھ بیلاروس کے کئی اعلیٰ حکام نے بھی شرکت کی۔
انٹرنیشنل ایگزیبیشن سینٹر بیلاروس کے "نارتھ بیچ" ترقیاتی منصوبے کا مرکزی حصہ ہے۔ یہ مرکز 37,000 مربع میٹر پر محیط ہے، جس میں 14,000 مربع میٹر سے زائد بیرونی نمائش کی جگہ موجود ہے، جو مختلف نوعیت کی تقریبات کی میزبانی کے لیے مکمل طور پر لیس ہے۔