ابوظہبی، 12 جون، 2025 (وام)--ابوظہبی کی ہاسپیٹیلٹی صنعت نے مارچ 2025 میں 61 کروڑ 10 لاکھ درہم کی آمدنی کے ساتھ اپنی مستحکم ترقی کا تسلسل برقرار رکھا ہے، جیسا کہ ثقافت و سیاحت کا محکمہ – ابوظہبی اور ابوظہبی کے شماریاتی مرکز کی جانب سے جاری کردہ ابتدائی اعداد و شمار میں ظاہر کیا گیا ہے۔
مجموعی آمدنی میں 34 کروڑ 50 لاکھ درہم کمرہ بکنگ، 22 کروڑ 80 لاکھ درہم خوراک و مشروبات، اور 3 کروڑ 80 لاکھ درہم دیگر ذرائع سے حاصل ہوئے۔ مارچ کے دوران تقریباً 4 لاکھ 17 ہزار مہمانوں نے ابوظہبی کا رخ کیا، جو امارت کی بین الاقوامی سیاحتی مقام کے طور پر مقبولیت میں اضافہ کی غمازی کرتا ہے۔ اس کامیابی کا سہرا ابوظہبی کے متنوع رہائشی اختیارات اور اعلیٰ معیار کی مہمان نوازی کو جاتا ہے۔
مارچ کے مہینے میں ابوظہبی میں 171 ہوٹل ادارے فعال رہے، جن میں 34,341 کمرے شامل تھے۔ ان اداروں میں 12 لاکھ سے زائد قیام کی راتیں ریکارڈ ہوئیں، جب کہ اوسط کمروں کی مصروفیت کی شرح 69 فیصد رہی۔ ریوینیو پر دستیاب کمرا (RevPAR) اوسطاً 486 درہم رہا۔
سیاحتی اعداد و شمار کے مطابق غیر عرب ایشیائی مہمانوں کی تعداد سب سے زیادہ، یعنی 1 لاکھ 52 ہزار رہی۔ اس کے بعد یورپی مہمانوں کی تعداد 1 لاکھ 23 ہزار رہی، جب کہ متحدہ عرب امارات کے شہری 58 ہزار قیام کے ساتھ تیسرے نمبر پر رہے۔ یہ اعداد و شمار ابوظہبی کی مضبوط عالمی سیاحتی حیثیت اور متنوع مارکیٹوں میں مقبولیت کو ظاہر کرتے ہیں۔
مارچ کے دوران پانچ ستارہ ہوٹل سب سے زیادہ مصروف رہے، جن میں 2 لاکھ 5 ہزار مہمانوں نے قیام کیا۔ اس زمرے میں یورپی مہمانوں کی تعداد 78 ہزار رہی۔ چار ستارہ ہوٹل میں 1 لاکھ 19 ہزار، تین ستارہ یا کم درجے کے ہوٹلوں میں 54 ہزار، جب کہ سروسڈ اپارٹمنٹس میں 38 ہزار مہمانوں نے قیام کیا۔
یہ مثبت پیش رفت ابوظہبی کی سیاحت حکمت عملی 2030 سے ہم آہنگ ہے، جس کا مقصد سالانہ 3 کروڑ 93 لاکھ سیاحوں کو متوجہ کرنا، 1 لاکھ 78 ہزار نئی ملازمتیں پیدا کرنا، ہوٹل کی گنجائش کو 50 ہزار کمروں تک بڑھانا اور سیاحت کے شعبے کی جی ڈی پی میں شراکت کو 90 ارب درہم تک پہنچانا ہے۔