بیجنگ، 22 جون، 2025 (وام)--چین نے اسلامی جمہوریہ ایران پر امریکہ کی جانب سے کیے گئے فضائی حملوں، بالخصوص ان جوہری تنصیبات کو نشانہ بنانے کی شدید مذمت کی ہے جو بین الاقوامی جوہری توانائی ایجنسی (IAEA) کی نگرانی میں تھیں۔ چینی وزارت خارجہ کے ترجمان نے اتوار کے روز اپنے بیان میں کہا کہ یہ اقدامات نہ صرف اقوام متحدہ کے منشور کے مقاصد و اصولوں کی سنگین خلاف ورزی ہیں بلکہ بین الاقوامی قوانین کے بھی منافی ہیں۔
بیان میں مزید کہا گیا کہ امریکی کارروائیوں کے نتیجے میں مشرق وسطیٰ میں کشیدگی میں اضافہ ہوا ہے، جس سے علاقائی استحکام کو شدید خطرات لاحق ہو گئے ہیں۔
ترجمان نے تمام فریقین، بالخصوص اسرائیل، پر زور دیا کہ وہ فوری طور پر جنگ بندی کریں، شہریوں کی سلامتی کو یقینی بنائیں اور گفت و شنید کا آغاز کریں تاکہ مسئلے کا پرامن اور دیرپا حل تلاش کیا جا سکے۔
چین نے یہ عزم ظاہر کیا کہ وہ عالمی برادری کے ساتھ مل کر انصاف کے قیام اور مشرق وسطیٰ میں امن و استحکام کی بحالی کے لیے اپنی کوششیں جاری رکھے گا۔