ابوظہبی، 23 جولائی، 2025 (وام)--ام الامارات پارک نے تدویر گروپ کے اشتراک سے ایک نئی ماحول دوست مہم "کیپ یور وے ٹو سسٹین ایبلیٹی" کا آغاز کیا ہے، جو چھ ماہ تک جاری رہے گی۔ اس مہم کا مقصد عوام کو استعمال شدہ پلاسٹک بوتلوں کے ڈھکن عطیہ کرنے کی ترغیب دینا ہے، تاکہ یہ ثابت کیا جا سکے کہ چھوٹے اور مستقل اقدامات کے ذریعے بھی ماحول میں مثبت تبدیلی لائی جا سکتی ہے۔
ام الامارات پارک اس مہم کا مرکزی جمع مرکز ہو گا، جب کہ اس کے علاوہ متعدد دیگر مقامات پر بھی ڈراپ آف پوائنٹس قائم کیے گئے ہیں، جن میں پارک کا مرکزی دروازہ، توتو ریستوران (سعدیات آئی لینڈ)، الراہہ بیچ کا C2 ٹاور، اور تین موبائل کلیکشن باکسز شامل ہیں، جو تدویر گروپ کے تحت اسکولوں اور کمیونٹی ایونٹس میں نصب کیے جائیں گے۔
پارک انتظامیہ نے شہریوں سے اپیل کی ہے کہ وہ مہم کے دوران اپنے گھروں میں جمع کیے گئے پلاسٹک ڈھکن ان مقررہ مقامات پر جمع کروائیں۔ مہم کے اختتام پر کمیونٹی کی شمولیت اور نتائج پر مبنی ایک خصوصی تقریب کا اہتمام کیا جائے گا، جس میں شریک افراد کی کاوشوں کو سراہا جائے گا اور مہم کے ماحولیاتی اثرات کو اجاگر کیا جائے گا۔
سال کے آغاز میں ام الامارات پارک اور تدویر گروپ کے مابین ایک یادداشتِ تفاهم (MoU) پر دستخط کیے گئے تھے، جس کا مقصد ماحولیاتی شعور اجاگر کرنا اور ابوظبی کی کمیونٹی کو پائیدار طرزِ زندگی اپنانے پر آمادہ کرنا تھا۔ اس میں مشترکہ تعلیمی اقدامات اور بہتر فضلہ انتظامی خدمات شامل ہیں۔
پارک میں تدویر گروپ کی جانب سے نصب کردہ 25 ریورس وینڈنگ مشینوں (RVMs) میں سے دو مشینیں موجود ہیں، جن کے ذریعے شہری خالی پلاسٹک بوتلیں اور ایلومینیم کین جمع کروا کر ’’تدویر ریوارڈز ایپ‘‘ کے ذریعے انعامات حاصل کر سکتے ہیں۔
پارک میں وقتاً فوقتاً تدویر گروپ کے اشتراک سے ماحول دوست ورکشاپس کا بھی انعقاد کیا جاتا ہے۔ حالیہ پروگرام ’’نقعہ‘‘ میں بچوں اور بڑوں کو تفریحی سرگرمیوں، ری سائیکلنگ پر مبنی کھیلوں اور معلوماتی ورکشاپس کے ذریعے ماحول سے جوڑنے کی کوشش کی گئی۔