دبئی 30 جولائی، 2025 (وام)--دبئی بلدیہ نے سال 2025 کی پہلی ششماہی میں خوراک کی حفاظت کے حوالے سے اہم کامیابیوں کا اعلان کیا ہے۔ رپورٹ کے مطابق، اس دوران دبئی بھر میں خوراک سے متعلق اداروں کے 34,700 معائنے کیے گئے، جن کا مقصد صحت سے متعلق منظور شدہ ضوابط اور حفاظتی معیار پر عمل درآمد کو یقینی بنانا تھا۔
بلدیہ نے ان اقدامات کو دبئی میں عوامی صحت کے تحفظ اور معیاری و محفوظ خوراک کی دستیابی یقینی بنانے کی اپنی مجموعی پالیسی کا حصہ قرار دیا ہے۔ ان کوششوں کا مقصد ایک مربوط اور پائیدار غذائی نظام قائم کرنا ہے، جو شہریوں اور سیاحوں کی زندگی کے معیار کو بہتر بنائے، اور دبئی کو دنیا کے رہنے کے قابل ترین اور مستقبل سے ہم آہنگ شہروں میں شامل کرے۔
رپورٹ میں یہ بھی انکشاف کیا گیا کہ مذکورہ عرصے میں دبئی میں تقریباً 2,336 نئی خوراکی ادارے قائم ہوئے، جو خوراک اور ہوٹلنگ کے شعبوں میں سرمایہ کاری کے لیے دبئی کی کشش کا مظہر ہیں۔ اسی دوران 1,73,775 خوراکی کھیپیں — جن کا مجموعی وزن 49 لاکھ ٹن رہا — دبئی کی بندرگاہوں سے کلیئر کی گئیں، جس سے شہر کی بطور عالمی فوڈ ٹریڈ گیٹ وے حیثیت مزید مستحکم ہوئی۔
بلدیہ نے مزید بتایا کہ سخت معائنے کے بعد تقریباً 9 لاکھ 40 ہزار خوراکی اشیاء کلیئر کی گئیں، جب کہ 77,700 سے زائد نئے خوراکی مصنوعات کو بلدیہ کے منظور شدہ ڈیٹا بیس میں رجسٹر کیا گیا۔ ان اعداد و شمار سے بلدیہ کے جدید ڈیجیٹل فوڈ رجسٹریشن اور معائنے کے نظام کی کارکردگی واضح ہوتی ہے، جو عالمی معیار اور بدلتے حفاظتی ضوابط سے ہم آہنگ ہیں۔
خوراک کی حفاظت کے شعبے کے ڈائریکٹر ڈاکٹر سلطان الطاہر نے کہا کہ خوراک کا محفوظ ہونا دبئی میں معیارِ زندگی بلند کرنے کی بنیاد ہے۔ ان کے مطابق بلدیہ ایک جامع اور پائیدار غذائی نظام کے قیام کے لیے کوشاں ہے، جو صارفین کا اعتماد جیتے اور مارکیٹ میں دستیاب خوراک کے معیار کو برقرار رکھے۔
انہوں نے مزید کہا کہ بلدیہ جدید ٹیکنالوجی اور اسمارٹ سسٹمز کو خوراک کی فراہمی کے ہر مرحلے میں ضم کر رہی ہے تاکہ دبئی کی تیزی سے ترقی کرتی معیشت اور تجارتی سرگرمیوں کے ساتھ ہم آہنگ رہ کر عوام کی صحت، تحفظ اور خوشی کو یقینی بنایا جا سکے۔