ابوظہبی، 31 جولائی 2025 (وام)--ابوظہبی کے ہوٹلنگ اور سیاحتی شعبے نے مئی 2025 کے دوران اپنی ترقی کا تسلسل برقرار رکھا، جہاں غیر ملکی سیاحوں کی تعداد میں اضافے اور ہوٹلوں میں بلند شرحِ قیام نے مثبت رجحان کو مزید مستحکم کیا۔ محکمہ ثقافت و سیاحت – ابوظہبی اور اسٹیٹسٹکس سینٹر ابوظہبی کی ابتدائی رپورٹ کے مطابق، صرف مئی کے مہینے میں ہوٹل شعبے کی مجموعی آمدنی 682 ملین درہم تک پہنچ گئی۔
رپورٹ میں بتایا گیا کہ اس آمدنی میں 408 ملین درہم کمرہ کرایہ جات سے، 224 ملین درہم خوراک و مشروبات کی فروخت سے، جبکہ 50 ملین درہم دیگر سروسز سے حاصل ہوئے۔ یہ اعداد و شمار نہ صرف سیاحتی شعبے کی وسعت کا اظہار ہیں بلکہ اس امر کی بھی عکاسی کرتے ہیں کہ ابوظہبی عالمی سطح پر ایک پرکشش سیاحتی مقام بنتا جا رہا ہے۔
مئی کے دوران امارت میں موجود 172 ہوٹلوں نے مجموعی طور پر 481,000 مہمانوں کو خوش آمدید کہا، جن کے قیام کی مجموعی راتیں 1.345 ملین سے تجاوز کر گئیں، جبکہ ہوٹلوں کی اوسط گنجائش 80 فیصد رہی۔ دستیاب کمروں سے فی کمرہ اوسط آمدنی 490 درہم ریکارڈ کی گئی، جو شعبے کی مستحکم کارکردگی کی علامت ہے۔
مہمانوں کی قومی شناخت کے لحاظ سے دیکھا جائے تو غیر عرب ایشیائی ممالک کے سیاحوں کی تعداد سب سے زیادہ یعنی 155,000 رہی، اس کے بعد یورپ سے 112,000 اور اماراتی شہریوں کی تعداد 88,000 رہی۔ خلیجی تعاون کونسل کے ممالک سے 31,000، دیگر عرب ممالک سے 52,000، شمالی و جنوبی امریکہ سے 25,000، اور غیر عرب افریقی ممالک سے 8,000 مہمان ابوظہبی آئے۔ دیگر مختلف خطوں سے بھی نمایاں تعداد میں سیاحوں کی آمد ریکارڈ کی گئی۔
درجہ بندی کے اعتبار سے پانچ ستارہ ہوٹلوں نے سب سے زیادہ یعنی 236,000 مہمانوں کی میزبانی کی، جن میں 72,000 یورپی سیاح نمایاں رہے۔ چار ستارہ ہوٹلوں میں 126,000، تین یا اس سے کم ستارہ ہوٹلوں میں 70,000، جبکہ ہوٹل اپارٹمنٹس میں 50,000 مہمانوں کو قیام کی سہولت فراہم کی گئی۔
یہ اعداد و شمار ابوظہبی کے سیاحتی مقام کے طور پر بڑھتے ہوئے وقار، خدمات کے اعلیٰ معیار، اور متنوع رہائشی سہولیات کی موجودگی کو واضح کرتے ہیں، جو عالمی مسافروں کے لیے اس امارت کو ایک پسندیدہ منزل بناتے جا رہے ہیں۔