بینکاک، 3 نومبر 2025 (وام)--متحدہ عرب امارات کی جیو جِتسو قومی ٹیم نے بینکاک میں جاری عالمی جیو جِتسو چیمپئن شپ میں شاندار کارکردگی کا مظاہرہ کرتے ہوئے تین تمغے جیتے۔ یومِ پرچم کے موقع پر اماراتی قومی ترانہ دو مرتبہ بجایا گیا، جب کھلاڑیوں نے ایونٹ میں کامیابیاں حاصل کیں۔
عمر السویدی نے مردوں کے 56 کلوگرام کیٹیگری میں چار شاندار مقابلوں کے بعد طلائی تمغہ جیتا، جبکہ شمعہ الکلبانی نے خواتین کے 63 کلوگرام مقابلے میں زخمی ہونے کے بعد شاندار واپسی کرتے ہوئے سونا حاصل کیا۔
اسی دوران، ذیاب النعیمی نے مردوں کے 56 کلوگرام کیٹیگری میں کانسی کا تمغہ جیتا۔
ان کامیابیوں کے بعد، یو اے ای کے مجموعی تمغوں کی تعداد چھ ہو گئی ہے جن مین تین طلائی، ایک چاندی، اور دو کانسی کے تمغے شامل ہیں جس سے ٹیم نے اپنی پوزیشن کو سرفہرست ممالک میں مزید مستحکم کر لیا ہے۔ یہ چیمپئن شپ 15 نومبر تک جاری رہے گی۔
چیئرمین یو اے ای اور ایشین جیو جِتسو فیڈریشنز اور نائب صدر عالمی جیو جِتسو فیڈریشن عبدالمنعم الہاشمی نے کھلاڑیوں کو مبارکباد دیتے ہوئے کہا کہ یہ فتوحات یومِ پرچم پر قوم کے نام ایک قیمتی تحفہ ہیں۔ انہوں نے کھلاڑیوں کی پیشہ ورانہ کارکردگی کو سراہا اور آئندہ مزید کامیابیوں پر اعتماد کا اظہار کیا۔
سیکریٹری جنرل یو اے ای اور ایشین جیو جِتسو فیڈریشنز فہد الشامسی نے کہا کہ یہ نتائج کھلاڑیوں کی محنت اور قومی یکجہتی کی عکاسی کرتے ہیں۔ انہوں نے کہاکہ، “یومِ پرچم پر حاصل کی گئی یہ کامیابی ہر اماراتی کے لیے فخر کا لمحہ ہے۔”
قومی ٹیموں کے سربراہ اور عالمی چیمپئن فیصل الکتبی نے کہا کہ یہ نتائج فیڈریشن کی ترقیاتی حکمتِ عملی اور قیادت کی حمایت کا ثبوت ہیں۔
طلائی تمغہ جیتنے والے عمر السویدی نے اپنی کامیابی یو اے ای کی قیادت اور عوام کے نام کی، اور کہا کہ ان کی توجہ اور تیاری کامیابی کی کنجی رہی ہے۔
اسی طرح، شمعہ الکلبانی نے بھی اپنا تمغہ قیادت کے نام کیا اور کہا کہ چوٹ کے بعد واپسی کو کامیابی میں بدلنا ان کے لیے حوصلہ افزا اور یادگار لمحہ ہے، جو انہیں مستقبل کے مقابلوں کے لیے مزید پرعزم بناتا ہے۔