ابوظہبی، 24 فروری، 2026 (وام) -- متحدہ عرب امارات نے نائجیریا کے شمال مغربی صوبے زامفارا میں ہونے والے دہشت گرد حملے کی سخت ترین الفاظ میں مذمت کرتے ہوئے اسے بزدلانہ اور انسانیت کے منافی اقدام قرار دیا ہے۔ اس حملے میں درجنوں افراد جاں بحق جبکہ متعدد خواتین اور بچوں کو اغوا کیے جانے کی اطلاعات ہیں۔
وزارت خارجہ کی جانب سے جاری بیان میں کہا گیا کہ متحدہ عرب امارات ہر قسم کے تشدد، انتہا پسندی اور دہشت گردی کو قطعی طور پر مسترد کرتا ہے، خصوصاً وہ کارروائیاں جو ریاستوں کے امن و استحکام اور شہریوں کی سلامتی کو نشانہ بناتی ہیں۔ بیان میں اس عزم کا اعادہ کیا گیا کہ امارات دہشت گردی کے خلاف عالمی کوششوں اور علاقائی استحکام کے فروغ کی حمایت جاری رکھے گا۔
وزارت نے اس المناک واقعے پر نائجیریا کی حکومت، عوام اور متاثرہ خاندانوں سے دلی تعزیت اور ہمدردی کا اظہار کرتے ہوئے جاں بحق افراد کے اہل خانہ کے ساتھ مکمل یکجہتی کا اظہار کیا۔