ابوظہبی، 28 فروری، 2026 (وام) --خطے میں جاری جیوپولیٹیکل پیش رفت کے تناظر میں وزارت معیشت و سیاحت نے ملک بھر کی منڈیوں کے استحکام اور اشیائے ضروریہ کی وافر دستیابی کی تصدیق کی ہے۔ وزارت کے مطابق متحدہ عرب امارات کے اسٹریٹجک ذخائر جامع، متنوع اور مضبوط بنیادوں پر قائم ہیں اور طویل مدت تک مقامی ضروریات پوری کرنے کی مکمل صلاحیت رکھتے ہیں۔
وزارت نے واضح کیا کہ بنیادی خوراکی اور غیر خوراکی اشیاء ملک کے تمام ریٹیل آؤٹ لیٹس پر دستیاب ہیں۔ جدید الیکٹرانک قیمت نگرانی نظام کے ذریعے سپلائرز اور ریٹیلرز کے ذخائر کی سطح کو مسلسل مانیٹر کیا جا رہا ہے، جبکہ باقاعدہ جائزوں کے ذریعے فراہمی کے تسلسل اور قیمتوں کے استحکام کو یقینی بنایا جا رہا ہے۔
اس موقع پر وزیر معیشت و سیاحت معالی عبداللہ بن طوق المری نے کہا کہ قیادت کی دور اندیش حکمت عملی کے باعث امارات نے ایک مضبوط اور لچکدار معاشی نظام قائم کیا ہے جو علاقائی و عالمی چیلنجز کا مقابلہ کرنے کی صلاحیت رکھتا ہے۔ انہوں نے کہا کہ خوراک کا تحفظ اور اشیاء کی مسلسل دستیابی ریاست کی اولین ترجیحات میں شامل ہیں۔
انہوں نے تصدیق کی کہ درآمدی سرگرمیاں معمول کے مطابق جاری ہیں اور فراہمی میں کسی رکاوٹ یا قلت کے آثار موجود نہیں۔ ان کے مطابق امارات نے عالمی سپلائی چین کے چیلنجز کو مؤثر حکمت عملی اور متنوع تجارتی شراکت داریوں کے ذریعے کامیابی سے سنبھالا ہے، جبکہ نئے درآمدی ذرائع اور منڈیاں مسلسل کھولی جا رہی ہیں۔
عبداللہ بن طوق نے زور دیا کہ بنیادی اشیاء خصوصاً خوراک کی فراہمی قیادت کے لیے ایک ریڈ لائن ہے اور ملک کے معاشی، خوراکی اور سماجی تحفظ پر کسی قسم کا سمجھوتہ نہیں کیا جائے گا۔ انہوں نے عوام سے اپیل کی کہ وہ اطمینان برقرار رکھیں اور غیر ضروری خریداری یا ذخیرہ اندوزی سے گریز کریں۔
وزارت نے بتایا کہ بڑے ریٹیل آؤٹ لیٹس نے بھی فراہمی کے تسلسل کی تصدیق کی ہے اور خریداری، درآمد یا دستیابی میں کوئی غیر معمولی تبدیلی نہیں آئی۔ سپلائرز اور ڈسٹری بیوٹرز کے ساتھ روزانہ رابطے کے ذریعے ذخائر کی مقدار اور کفایت کی سطح کا تعین کیا جا رہا ہے۔
وزارت نے اس بات پر بھی زور دیا کہ جدید لاجسٹکس نظام، مربوط بندرگاہی و فضائی ڈھانچہ اور متنوع تجارتی راستے امارات کو اشیاء کی تقسیم کے علاقائی مرکز کے طور پر مستحکم بناتے ہیں، جس سے مقامی منڈی کی ضروریات بروقت اور مؤثر انداز میں پوری کی جا سکتی ہیں۔
قیمتوں کے استحکام کے لیے وزارت نے باقاعدہ معائنہ مہمات جاری رکھنے کی تصدیق کی ہے تاکہ بلا جواز قیمتوں میں اضافے اور اجارہ داری کے رجحانات کو روکا جا سکے، اور صارفین کے تحفظ کے قوانین پر سختی سے عمل درآمد یقینی بنایا جا سکے۔
وزارت نے عوام سے کہا کہ وہ ذمہ داری کا مظاہرہ کریں، صرف ضرورت کے مطابق خریداری کریں اور معلومات کے لیے سرکاری ذرائع سے رجوع کریں۔ قیمتوں یا دستیابی سے متعلق کسی بھی شکایت کے لیے عوام وزارت کی ویب سائٹ، ٹول فری نمبر 8001222 یا ای میل info@economy.ae کے ذریعے رابطہ کر سکتے ہیں۔