آئندہ پانچ سال میں تیل و گیس کے شعبے میں مصنوعی ذہانت کے ایجنٹس کا استعمال عام ہونے کا امکان: شیپ ڈیجیٹل

آئندہ پانچ سال میں تیل و گیس کے شعبے میں مصنوعی ذہانت کے ایجنٹس کا استعمال عام ہونے کا امکان: شیپ ڈیجیٹل

ابوظہبی، 3 نومبر، 2026 (وام) -- شیپ ڈیجیٹل کے نائب صدر برائے ترقی و کاروباری فروغ لیونارڈو ماشادو نے کہا ہے کہ آئندہ پانچ سال کے دوران مصنوعی ذہانت کے ایجنٹس تیل و گیس کی صنعت کے روزمرہ آپریشنز کا حصہ بن سکتے ہیں، جس سے ماہرین کو معلومات کے تجزیے اور اہم فیصلے کرنے کے لیے زیادہ وقت میسر آئے گا۔

اڈیپیک 2026 کے موقع پر ایمریٹس نیوز ایجنسی، وام سے گفتگو کرتے ہوئے انہوں نے کہا کہ مصنوعی ذہانت کے ایجنٹس کی بیک وقت متعدد کام انجام دینے کی صلاحیت میں مسلسل اضافہ ہو رہا ہے، تاہم ٹیکنالوجی میں تبدیلی کی رفتار اور صنعتی شعبے پر اس کے مستقبل کے اثرات کا درست اندازہ لگانا فی الحال مشکل ہے۔

لیونارڈو ماشادو نے پیر کو ادنوک، جی42 اور اوپن اے آئی کے درمیان طے پانے والے معاہدے کو صنعتی شعبے میں مصنوعی ذہانت کے استعمال کو وسعت دینے کی جانب اہم پیش رفت قرار دیا۔ معاہدے کے تحت ادنوک توانائی کے شعبے کی پہلی کمپنی ہوگی جو اوپن اے آئی کے جدید پلیٹ فارم 'فرنٹیئر' کو استعمال کرے گی، جسے پیچیدہ کاروباری آپریشنز میں مصنوعی ذہانت کے مختلف ایجنٹس کے درمیان رابطے اور ان کے کام کو مربوط بنانے کے لیے تیار کیا گیا ہے۔

انہوں نے کہا کہ جی42 کے تکنیکی بنیادی ڈھانچے، اوپن اے آئی کے جدید مصنوعی ذہانت ماڈلز اور ادنوک کی آپریشنل مہارت کا امتزاج تیل و گیس کے شعبے میں اس ٹیکنالوجی کے استعمال کو تیز کرنے کے لیے مضبوط بنیاد فراہم کرتا ہے۔

شیپ ڈیجیٹل کی سرگرمیوں کے حوالے سے انہوں نے بتایا کہ کمپنی نے حال ہی میں اپنی تکنیکی صلاحیتوں کو وسعت دی ہے، جس کے نتیجے میں مینٹیننس انجینئرز، تکنیکی ماہرین اور دیگر صنعتی پیشہ ور افراد اب کمپنی کے ڈیٹا، اوپن اے آئی کے ماڈلز اور شیپ ڈیجیٹل کے پیش گوئی کرنے والے ماڈلز کی مدد سے اپنی ایپلی کیشنز اور مصنوعی ذہانت کے ایجنٹس تیار کر سکتے ہیں۔

لیونارڈو ماشادو کے مطابق مصنوعی ذہانت کی مدد سے کیے جانے والے فیصلوں پر اعتماد بڑھانے کے لیے ضروری ہے کہ سینسرز سے حاصل ہونے والا ڈیٹا قابل اعتماد ہو، اسے متعلقہ حالات اور ضروریات کے تناظر میں درست طور پر استعمال کیا جائے اور پیش گوئی کرنے والے ماڈلز کی کارکردگی کی تصدیق کی گئی ہو۔ انہوں نے کہا کہ ابتدائی آزمائشی منصوبوں کے ذریعے ڈیٹا کے معیار اور ماڈلز کی درستگی کا جائزہ لے کر انہیں بڑے پیمانے پر استعمال کیا جا سکتا ہے۔

کمپنی کے عالمی توسیعی منصوبوں پر روشنی ڈالتے ہوئے انہوں نے بتایا کہ شیپ ڈیجیٹل کا صدر دفتر امریکی شہر ہیوسٹن میں ہے، جبکہ برازیل میں بھی اس کی نمایاں کاروباری سرگرمیاں جاری ہیں۔ کمپنی اب یورپی منڈیوں میں قدم رکھ رہی ہے اور مشرق وسطیٰ میں دفتر کا قیام اس کی توسیعی حکمت عملی کا اگلا اہم مرحلہ ہوگا۔

عالمی سطح پر توانائی کی بڑھتی ہوئی طلب اور مصنوعی ذہانت کی ٹیکنالوجیز کے لیے درکار بجلی کی ضروریات کا ذکر کرتے ہوئے لیونارڈو ماشادو نے کمپنی کے دو ایسے جدید حل متعارف کرائے جو توانائی کے مؤثر استعمال میں مدد دیتے ہیں۔

انہوں نے بتایا کہ پہلا حل پیداواری تنصیبات کی کارکردگی بہتر بنانے کے لیے تیار کیا گیا ہے، جس سے ایندھن کی کھپت کم کرتے ہوئے پلانٹس کی پیداواری صلاحیت کو زیادہ سے زیادہ بڑھایا جا سکتا ہے۔ اس کے نتیجے میں کاربن ڈائی آکسائیڈ کے اخراج اور آپریشنل اخراجات میں بھی کمی آتی ہے۔

دوسرا حل گیس فلیئرنگ کے انتظام سے متعلق ہے، جسے دو ماہ قبل متعارف کرایا گیا تھا۔ یہ نظام صنعتی تنصیبات میں اضافی گیس جلانے کے عمل سے پیدا ہونے والے اخراج کی مسلسل نگرانی کرتا ہے۔ لیونارڈو ماشادو کے مطابق اس ٹیکنالوجی کے استعمال سے اخراج میں تقریباً 12 فیصد کمی حاصل کی گئی ہے۔

انہوں نے مزید بتایا کہ شیپ ڈیجیٹل صنعتی اثاثوں اور بھاری مشینری پر انحصار کرنے والے شعبوں کے لیے مصنوعی ذہانت کے جدید پلیٹ فارمز تیار کرتی ہے، جن کا مقصد آلات کی کارکردگی اور قابل اعتماد استعمال، توانائی کی بچت، گیس فلیئرنگ سے ہونے والے اخراج کے انتظام اور صنعتی عمل کے تحفظ کو بہتر بنانا ہے۔